【有日屎忽痕一條友去印度食左半個月咖哩】 #19
右手初體驗
返去hostel休息嗰陣，已經係黃昏時份，Rohit話佢今晚會同朋友食飯，問我一唔一齊join。能夠識多個印度朋友，我當然無任歡迎。至於我點解咁信Rohit？唔單止係因為佢都係一個backpacker，而係我感覺到佢係一個真係想同你friend但完全唔係想喺你身上攞著數嘅人。就好似頭先買街頭小食嗰陣佢完全冇問過我攞錢，甚至我之後打算俾返錢佢佢都話唔駛，同埋有時候first impression都好緊要，正如我第一次見到Shasha嗰時已經有防備之心，但今次Rohit俾我嘅感覺係好放心。
返到hostel見個鬼妹仲係訓咗喺床，不過佢已經醒咗，Rohit問佢同唔同埋我地一齊食，不過個鬼妹望一望佢，然後就好有禮拜咁拒絕咗。我見返到黎又冇野做，就同Rohit講不如去附近飲杯啤酒一邊等佢個friend。於是我地屎忽都未坐暖又著返鞋出去，我地搵咗間酒店嘅rooftop café，可以睇晒成個Jodhpur嘅夜景，我拎住杯啤酒行到上最頂望住個夜景，哇！真係好X‥
凍呀！！
飲咗2杯，佢個friend終於黎到，不過我又係唔記得咗佢叫咩名。只係記得我地三個人坐一架電單車，佢朋友開車，Rohit坐最後，而我就好似人肉三文治咁俾人夾咗喺中間，佢地咁大舊差d夾到我斷氣呀！我地去咗一間又係得印度人食嘅餐廳，得4張枱不過坐滿晒嘅，佢地問我想食咩，我見好耐冇食咖哩所以就同佢地講我要食咖哩雞。我唔記得咗呢間餐廳係本地人食開，所以係冇餐具架！於是我只有硬住頭皮學佢地用手食，由於習慣咗會用兩隻手一齊食，所以當佢地用奇怪嘅眼神望住我個陣，我先記得用左手食野係唔禮物嘅，咁我只有嘗試淨係用右手搣塊薄餅蘸d咖哩黎食，其實食食下又真係幾過癮，得閒仲可以啜下手指添！
好多人都問我去咗咁多日有冇肚屙，又真係冇wor，可能我個人已經毒到百毒不侵啦！
#india
#背包浪子印度神遊
Search